बाँके २० वैशाख - बैजनाथ गाउँपालिका वडा नं. ३ स्थित नौबस्ता कारागारको बिहीबार उद्घाटन गरिएको छ । उपप्रधान एवम् गृहमन्त्री रबी लामिछानेद्वारा उक्त कारागारको उद्घाटन गरिएको हो ।
उद्घाटन गर्दै गृहमन्त्री लामिछानेले कारागारमा जेल जीवन बिताइरहेका कैदी बन्दीहरूले गरेको अपराधको सजाय भन्दा अन्य थप केही सजाय दिन नमिल्ने बताएका छन् ।
उनले कारागारलाई सुधार गृहका रूपमा रूपान्तरण गर्नका लागि गृह मन्त्रालय र सरकार संधै अग्रपंक्तिमा रहेको र सुधारोन्मुख कार्यका लागि पहलिकदम चाल्ने गृहमन्त्री लामिछानेले बताएका छन् ।
कैदीको कैद मिनाहा तथा माफीमा कुनै विभेद नगरि असल आचरण र कानुनले तोकिएको मापदण्ड पूरा गरेको कैदी बन्दीहरू नियमानुसार छुट्नुपर्ने गृहमन्त्री लामिछानेले बताएका छन् ।
२०७९ मङ्सिरमा निर्माण सम्पन्न गरिएको बाँकेको नौबस्ता कारागारमा हाल एक सय ३० जना कैदी बन्दीहरु रहेका छन् । १ सय ३४ रोपनी क्षेत्रफलमा फैलिएको कारागारको प्रत्येक ब्लकमा एक–एक हजार कैदीबन्दी अटाउँछन् ।