प्रेम सिंह एस.के.
नेपालगन्ज ३० असार - बाँकेको नेपालगन्ज उपमहानगरपालिका वडा नं. २२ मुन्डापुर्वा स्थित जामिया मोईनिया बादरुल उलुम मदरसाको आयोजनामा छात्रवृत्ति वितरण गरिएको हो । २०६३ सालमा तत्कालिन जिल्ला शिक्षा कार्यालय बाँकेबाट अनुमति प्राप्त गरि २०६४ साल देखि निरन्तर रुपमा सञ्चालित सो मदरसामा नेपाली, अङ्ग्रेजी, गणित, विज्ञान, उर्दु र अरबीका विषयहरु पढाइ भईरहेको छ । सो मदरसामा १ देखि ३ कक्षा पढ्ने १ सय ८ जना विद्यार्थी अध्ययनरत छन् ।


मदरसाका प्रधानाध्यापक वि.वि. हाजरा नाँउले मदरसा भनेकै खासमा मुस्लिम समुदायको अरबी र उर्दु भाषामा अध्ययन र तालीम दिने शैक्षिक संस्था रहेको बताएकि हुन । मदरसामा अध्ययनरत बालबालिकाको भविष्य सुधारमा अभिभावकको अहम भूमिकाभएकोले समय, बालबालिकाको उमेर र उनिहरुमाथि गरिने लगानीमा ध्यान दिन सबैसंग नाँउले आग्रह समेत गरिन् । सो मदरसामा मुस्लिम समुदायका बालबालिका गरिब र असहायकै छोराछोरी अध्ययन गर्दै आएका छन् ।
उनले भनिन् - ''बिजुली बत्ति, भौतिक पूर्वाधार संरक्षणका लागि पर्खालको व्यवस्थापन, खेलकुद तथा शैक्षिक सामाग्रीको व्यवस्था, शौचालय निर्माणका लागि सहयोग , शिक्षक ब्यवस्थापन, पोशाक अनुदान दिने व्यवस्था गरिदिए पठनपाठनमा सहज हुने थियो ।'' सरकारले अहिले मदरसालाई राहत शिक्षक, छात्रवृत्ति र पाठ्यक्रम खरीदका लागि राहत अनुदान उपलब्ध गराउँदै आएको छ । त्यसैक्रममा उक्त मदरसामा अध्ययन गरिरहेका ७५ जना छात्राहरुलाई ४ सय रुपैयाका दरले शनिबार छात्रवृत्ति बितरण गरिएको हो ।
सो अवसरमा मदरसाका बालबालिका, शिक्षक शिक्षिका, कर्मचारी अभिभावक लगायतको उपस्थिति रहेको थियो । हाल ३ शिक्षिका, २ शिक्षक र १ जना महिला कार्यालय सहयोगी गरि ६ जना रहेका छन् । सो मदरसाको व्यवस्थापन समितीको अध्यक्ष जाफर अलि नाँउ रहेका छन ।










