नेपालगन्ज - बाँकेमा गत पुस १२ गतेदेखि फैलिएको दादुरा संक्रमण प्रकोपको रुपमा फैलिएको छ । नेपालगन्ज उपमहानगरपालिकाबाट फैलिएको दादुरा बाँकेको राप्तीसोनारी गाउँपालिकामा पनि देखिएको छ । बाँकेका अहिलेसम्म ३ सय १ जना बालबालिकामा दादुरा संक्रमण देखिएको स्वास्थ्य कार्यालय बाँकेले जानकारी दिएको छ ।
बाँकेका ६ वटा पालिकामा गरी दादुरासंक्रमित बालबालिकाको संख्या ३ सय १ पुगेको स्वास्थ्य कार्यालय बाँकेले जनाएको छ । हालसम्म दादुरा संक्रमित भएका मध्ये २ सय ९२ जना निको भइसकेका छन् भने ८ जना आइसोलेशनमा उपचाररत छन् । जिल्लाका ६ वटा पालिकामा दादुरा फैलिएको छ भने बैजनाथ र जानकी गाउँपालिकामा देखिएको छैन ।
सोमबार राप्तिसोनारी गाउँपालिका वडा नं २ मा १५ महिनाको बालिकामा दादुरा देखिएको स्वास्थ्य कार्यालय बाँकेका खोप फोकल पर्सन नरेश श्रेष्ठले जानकारी दिएका छन् ।
महामारी प्रभावित पालिकाहरुमा दादुरा-रुबेला खोप अभियानलाई तीब्रता दिइएको छ । जस्का कारण दादुरा नियन्त्रणमा पनि आइरहेको छ । दादुराका कारण हालसम्म एक जनाको मृत्यु भएको स्वास्थ्य कार्यालयले जनाएको छ । बाँकेको नेपालगञ्ज , कोहलपुर , खजुरा, नरैनापुर र डुडुवा गाउँपालिकामा गरी ३३ वटा वडा दादुरा प्रभावित भएका छन् ।
संक्रमण तीव्र रुपमा फैलिएपछि बाँकेमा ६ महिनादेखि १५ वर्षमुनिका दादुरा, रुबेलाविरुद्धको खोप दिइएको छ । बाँकेबाट फैलिएको दादुरा छिमेकी जिल्लामा समेत फैलिएको छ ।