नेपालगन्ज उपमहानगरपालिकाद्धारा फुटपाथ खाली गराउँदै

शाख न्यूज    प्रकाशित: २०७९-५-१२ गते   २१३ पटक हेरिएको

नेपालगन्ज १२ भदौ -  नेपालगन्ज उपमहानगरपालिकाका मेयर प्रशान्त विष्ट आज आफैं फुटपाथ खाली गराउन हिंडेका छन् । विष्ट आज साँझ त्रिभुवन चोक र त्रिवेणी मोड क्षेत्रमा फुटपाथ खाली गराउन हिँडेका थिए । आज उनले व्यवसायीहरुलाई सम्झाएका छन् । अटेर गरे भोलीदेखि कडारुपमा प्रस्तुत हुने विष्टले प्रतिक्रिया दिए ।

नेपालगन्ज उद्योग बाणिज्य संघका अध्यक्ष अब्दुल वाहिद मन्सुरी चुन्ना, महासचिव चिरञ्जिवी वली, ट्राफिक प्रहरी प्रमुख हिमालय शाह, वडा प्रहरी प्रमुख रिपेन्द्रकुमार सिंह, नगर प्रहरी प्रमुख सूर्य वहादुर बोगटीसहित निस्केका मेयर विष्टले फुटपाथ अतिक्रमणलाई निरुत्साहित गर्ने लक्ष्यका साथ अभियान थालिएको बताए । यो अभियानको हिजोदेखि सुरुवात गरिएको थियो । 

फुटपाथ अतिक्रमण गरेर व्यापार व्यवसाय गर्ने, सडकमै साइकल र ठेलामा सामान बेच्ने, सडक र सडकपेटीमा जथाभावी पार्किंग गर्ने कामलाई निरुत्साहित गर्न अब नियमितरुपमा अभियान सञ्चालन गरिने नगर प्रमुख प्रशान्त विष्टले बताए । 

हिजो साँझ पनि फुटपाथ खाली गराउन नगर प्रहरी र ट्राफिक प्रहरीको टोली बजारमा निस्केको थियो । ट्राफिक प्रहरी प्रहरी प्रमुख शाह र नगर प्रहरी प्रमुख बोगटी नेतृत्वको टोलीले हिजो विपी चोकदेखि तरकारी मण्डी सम्मको फुटपाथ खाली गराएको थियो । 

नेपालगन्ज उपमहानगरपालिका अगाडिको क्षेत्र, विपी चोक, इदगाहरोड, त्रिभुवनचोक, त्रिभुवनचोक उत्तर तर्फको सदरलाइन, त्रिभुवन चोकको पूर्व लाइन हुँदै तरकारी मण्डी सम्मको सडकपेटी खाली गराइएको थियो । त्यस क्रममा बाटोमा जथाभावी पार्किंग गरिएका केही मोटरसाइकल र रिक्सा समेत नियन्त्रणमा लिइएको थियो । सडकपेटी अतिक्रमण नियन्त्रणलाई प्रभावकारी बनाउने रणनीतिका साथ उपमहानगरपालिका अगाडि बढेको मेयर विष्टको भनाई छ । 

© Copyright 2020 Sakhanews. All rights reserved.
सस्तो नभई भरपर्दाे वेबसाईट बनाउन सम्पर्क : ९८०१०३५९०५
Design & Developed By : Journey For Tech