नेपालगञ्ज, साउन ११ गते —लकडाउनका कारण पाँच महिनादेखि अरुकै सहारामा नेपालगञ्जमा उपचार गराइरहेका डोल्पाका दुई वृद्धा महिलालाई आज घर पठाइएको छ । उपचारका लागि फागुन १७ गते नेपालगञ्ज आएका डोल्पा ठुली भेरी– १ दुनैकी सीता कुमारी शाही र लक्ष्मी मल्ल ठकुरी अलपत्र सरहको अवस्थामा रहंँदै आएका बेला डोल्पाकी एक चेलीले उद्धार गरि उपचारसँगै सहारा दिनु भएको थियो । जिल्ला प्रशासन कार्यालय डोल्पाको पहलमा ठुली भेरी नगरपालिकाले दुई जनाको हवाई टिकटको व्यवस्था गरिदिएपछि आज विहान उनीहरु आफनो घर पुगेका हुन् । दुनैका व्यक्तिहरुबाट सहयोग जुटाएर आउनु भएका उहाँहरु राम्ररी उपचार गर्न नपाउदै लकडाउनमा पर्नुभएपछि नेपालगञ्ज वडा नम्बर २० रांँझा एअरपोर्ट नजिकै पशुपतिनगरमा चैत्र १० देखि वस्दै आउनुभएको थियो ।

भएको पैसा उपचार र खाना खर्चमा गएपछि साँझ विहानको छाक टार्न पनि धौधौ भएको दयनीय खवर सार्वजनिक भएपछि कारकाँदो निवासी बसन्ती रोकाया शर्माले जेठ २१ गते उद्धार गरेर आफनो घरमा बास दिनुभएको हो । डोल्पा माइत भएकी रोकायाले घरमा ल्याएर राख्नुका साथै भेरी अस्पतालमा भर्ना गरेर उपचार शुरु गर्नु भएको हो । दुई महिना आफनो घरमा राखेर सेवा गर्नु भएकी रोकायाले आज विहान उहाँहरुलाई एअरपोर्ट पुगाउनु भएको हो । सहारावीहीन उनीहरुको उपचारका लागि सम्वाद समूह बाँकेका सहजकर्ता शुक्रऋषि चौलागाईले भेरी अस्पतालमा आवश्यक समन्वय र सहजीकरण गरिदिनु भएको थियो ।