स्वतन्त्र पार्टी (रास्वपा) का सांसद डीपी अर्याल सभामुख पदमा निर्विरोध चयन

शाख न्यूज    प्रकाशित: २०८२-१२-२० गते   ४४४ पटक हेरिएको

काठमाडौं - प्रतिनिधिसभाको सभामुख पदका लागि राष्ट्रिय स्वतन्त्र पार्टी (रास्वपा) का सांसद डीपी अर्यालको एकल उम्मेदवारी परेपछि उनी निर्विरोध चयन भएका छन् । यद्यपि, उनको औपचारिक घोषणा भने आगामी प्रतिनिधिसभा बैठकबाट गरिनेछ।

सभामुखका लागि आज बिहान ११ बजेदेखि दिउँसो २ बजेसम्म मनोनयन दर्ताको समय तोकिएको थियो। सो अवधिमा अर्याल बाहेक अन्य कुनै उम्मेदवार नआएपछि उनी निर्विरोध बन्ने अवस्था बनेको हो।

प्रतिनिधिसभा नियमावली अनुसार, यदि सभामुख पदका लागि एक मात्र उम्मेदवार रहन्छ भने संसद् बैठकमा प्रस्तावकले समर्थन जनाएपछि अध्यक्षता गर्ने व्यक्तिले उनलाई निर्विरोध निर्वाचित भएको घोषणा गर्ने प्रावधान छ। यही प्रक्रिया अब आइतबार बस्ने बैठकमा पूरा हुनेछ।

संसद्‍मा सत्तारुढ दल रास्वपाको स्पष्ट बहुमत रहेकाले प्रतिपक्षी दलहरूले सभामुखमा उम्मेदवारी दिएका छैनन्। २७५ सदस्यीय प्रतिनिधिसभामा रास्वपाका मात्रै १८२ सांसद छन् भने अन्य दलहरूको संख्या तुलनात्मक रूपमा कम छ।

सभामुख चयनपछि उपसभामुखको निर्वाचन प्रक्रिया अघि बढ्नेछ। उपसभामुखको निर्वाचन मिति सभामुखले तोक्ने व्यवस्था रहेको छ। संसद् सचिवालयका अनुसार सामान्यतः सभामुख र उपसभामुख फरक दल र फरक लिंगबाट हुनुपर्ने प्रावधान छ, तर एकल उम्मेदवारीको अवस्थामा केही लचकता रहन सक्ने बताइएको छ।

उपसभामुख पद कसले पाउने भन्ने विषय अहिले राजनीतिक वृत्तमा चासोको केन्द्र बनेको छ, किनकि सभामुख र उपसभामुख दुवै संवैधानिक परिषद्को सदस्य हुनेछन्। उक्त परिषद्ले संवैधानिक निकायका प्रमुख तथा पदाधिकारीहरूको नियुक्तिका लागि सिफारिस गर्ने महत्वपूर्ण जिम्मेवारी वहन गर्छ।

यसैले उपसभामुख चयनलाई केवल औपचारिक प्रक्रिया नभई शक्ति सन्तुलनसँग जोडेर पनि हेरिएको छ।

© Copyright 2020 Sakhanews. All rights reserved.
सस्तो नभई भरपर्दाे वेबसाईट बनाउन सम्पर्क : ९८०१०३५९०५
Design & Developed By : Journey For Tech